Zot fine rentre dan la chambre et zot dir Tifou nou sorti dehors. Tifou ti paraite bien calme, trop calme mem. Li pa dir nanrien et li aide zot pou tir matelas amene dehors. Zot pé essaye trouve ene place pou mettre matelas, Tifou dir mette matelas enbas sa gros pied la. Pou ene fois, zot tou fine dacord ar Tifou et zot mette matelas enbas gros pied la. Ti ena ene calme extraordinaire enbas sa pied la, zot tou pé paraite bien agiter, excepter Tifou. Tifou so ban camarades dir li, ki arriver to fine arrete peur, Tifou pa dir nanrien, li fair ene sourire, et c'est ene sourire ironique. Zot tou pé causer pé raconte a propo sa l'incident la. Tifou pa dir nanrien. Tifou pa cause ditou. Picsou alle realiser ki li fine laisse so jacket dans sa la caz la, person pa pé rode retourne dan la caz la. Ti malang dir Tifou to pa parait gagne peur, alle cherche jacket la. Zot tou pé riyer, zot koné couma Tifou ene grand capon et zot koné ki zamais Tifou pou rode aller. Zot fine extra choquer kan zot trouve Tifou lever et li pé dirige li vers sa la caz la. Letan Tifou aller banla dir bé ki fine arrive Tifou,
li pa peur ditout. Zot trouve Tifou rentrer et sorti avec so jacket.
Letan Picsou alle prend jacket ar Tifou, li alle realiser ki Tifou so li pied pa tousse la terre, Picsou senti so du sang glacer, mots pa pé sorti dan so la bouche et person pas fine remark sa. Letan ban camarades trouve Picsou so lizié fine sorti gros et li pa pé capav causer, zot alle remarque Tifou so li pied pa tousse laterre. Zot tou coumence crier et galouper.
Sa vitesse zot galouper la, zamais zot fine galoupe aussi vite ki sa. Person pas oser virer pou guetter si Tifou pé tire deriere zot. Tou les quatre camarades reussi rentre endan la caz la, zot pé suffoquer. Zot degager ferme la porte et zot touzour dan noir.
Ene grand garçon couma Scoubidou, fine assize enbas, 25 ans li ena, près pou marier, fini fixer mariage et mariage pou mois prochain, ala li coumence plorer. Ti malang dir “d'après lorde nou pe mort ici mem”. Zot figure fine changer, fine vine tipti, pa pé koné kot pou alle rode secours. Zot pa pé tanne nanrien, bien trankil. Ti malang pé ouvert so oreille bien grand mais pena auken son. Picsou demande Grand conaissere, ki fine arrive Tifou. Couma Tifou fine vine coumsa. Scoubidou dire "Eta couyon to pa trouver diable fine rentre ar li, la si to pa pé compran mem". Picsou dir “bez sa mo pa encore maryer, fantom pou prend mo la vie, cote mama été!!”
Après cinq minutes, la porte coumence taper, “Toc toc! toc toc!
“Mwa sa Tifou, ouvert la porte, ouvert la porte!”
Zot pa pé koné ki pou faire, kieter sa! tifou?? Oubien ene piege!. Ouvert, pa ouvert!
Scoubidou dir, pa ouvert la porte, Tifou coumence plorer li dir kifair zot pé laisse mwa dehors ouvert la porte. “Nou pa capav laisse Tifou dehors kan mem, surema diable la fine tte li”, dir Grand conaissere. Grand conaissere pa écoute personne li ena pou ouvert la porte.
Tifou rentrer pé plorer, après li arrete plorer, li coumence riyer couma ene fou. So lizié change couleur, li vine vert et so li pied touzour pa tousse la terre. Zot tou coumence criyer, coumence trembler, galouper dan noir, tou ban zafair pé crazer dan la caz par zot tou sel, vitre coumence crazer, nappe la table pé envoler. Zot trouve Tifou fine monte dans l'air et so cheveux fine vine en pique. Tifou coumence causer, li dir “rende moi mo la chaine, rende moi mo la chaine”. Zot tou dir ki la chaine, Tifou dir seki zot ti prend cot la mer la.
Scoubidou degager tir sa la chaine la depi so li cou et pose li enbas. Tifou dir “to alle mette li la bas mem. Sinon mo pou prend zot tou avec moi”. Scoubidou reprend la chaine, li et tou so ban camarades prend loto, Ti malang roule plis vite ki li capav alle cot la mer et pose la chaine la bas, en chemin zot pé extra tracasser. “Ki pou arrive Tifou la, eski diable la pou reste avek li”. Picsou dir “hey, anou alle la caz direct”. Mais lezot pas dacord, zot dir nou bizin retourne dan sa la caz la et guetter si Tifou fine retourne normal. Impossible pou retourner san li, zot fine coumence faire la priere dan loto.
Letan zot ariver, zot trouve Tifou san conaissance lor sali devan la porte lentrer. Zot pé peur mais tou doucema, zot approche Tifou et essaye touche li avec ene la main bien hesitan. Tifou ouvert so li yeux, li demane so ban camarades, “kifaire zot pé entour mwa, ki fine arriver?” Grand conaissere dire “Nanrien pa fine arriver.”
Picsou so sommeil casser, li dir ene extra cauchemar li fine fair ek so ban camarades. Telephone ena pou sonner, Scoubidou dir li zot tou pé mette plan pou alle la mer. Picsou dir “la mer?? Non pa mette plan la mer, ene prochaine fois”. Scoubidoo dir pou ena tou ban bon camarades, Grand conaissere, Tifou, Ti malang, moi et toi. Picsou dir non pa mette program zordi mais Scoubidou fine reussi oblige li. Zot tou fine alle la mer, zot finne passe ene bon moment, letan arriver vers six heures, Scoubidou trouve ene zoli la chaine Kot ene grand pied, Scoubidoo ramasse li mette dans so li cou sans ki person koné…
Syndication